Lajmet e fundit!

Dy dekada që kur NATO riktheu shpresën

Para dy dekadave në Kosovë patën hyrë trupat e NATO-s, të cilat ua rikthyen kosovarëve shpresën e humbur për jetë.

Kosova po i bën përgatitjet e fundit për shënimin e 20-vjetorit të hyrjes së trupave të NATO-s në vend pas dëbimit të forcave ushtarake, policore dhe paramilitare serbe, të cilat kryen krime makabre ndaj popullatës civile.

Më 12 qershor të vitit 1999 në Kosovë patën hyrë rreth 50 mijë trupa të KFOR-it, numër ky që pas dy dekadave është reduktuar në 3500 sosh si rezultat i përmirësimit të situatës së sigurisë në vend. Zyrtarë të KFOR-it tregojnë për “Zërin” se në qershor të vitit 1999 në Kosovë kishin arritur ushtarë nga 39 kombe të ndryshme të botës.

“Nuk është e lehtë të tregohet numri i saktë i ushtarëve që patën hyrë në Kosovë më 12 qershor 1999, por e dimë se gjatë muajve të parë ishin rreth 50.000 ushtarë nga rreth 39 kombe. Gjatë 20 vjetëve të fundit numri i tyre ka ndryshuar vazhdimisht në përputhje me zhvillimet. Sot janë rreth 3500 trupa, me kontributin e 28 kombeve, 20 prej të cilave janë pjesë e NATO-s dhe e 8 vendeve partnere”, thuhet në përgjigjen e KFOR-it dhënë gazetës “Zëri”.