Xhavit Haliti, anëtar i kryesisë së PDK-së, ka përkujtuar profesorin e ndjerë Anton Çetën, në nder të jubilarit të Lëvizjes për Pajtimin e Gjaqeve, të cilës i kryesonte ky i fundit.
Përkujtimin Haliti e ka bërë përmes një fotografie të kohës për faljen e gjakut të vëllait të tij, ku prezent ishte profesori Çeta.
Tutje, Haliti ka rrumbullakosur në fotografi edhe babain e tij, përgjatë momentit të faljes së gjakut.
Postimi i plotë i tij:
2020-ta është viti jubilar i Lëvizjes për Pajtimin e Gjaqeve.
Ndjehem krenar që me faljen e gjakut të vëllait, Agimit, i dhamë krah rinisë nismëtare studentore dhe plakut të urtë, profesor Anton Çetta, për të mbyllur plagën e gjakmarrjes, si parakusht i domosdoshëm për krijimin e Ushtrisë Çlirimtare të Kosovës dhe hyrje në luftën çlirimtare.
Në foto, pas plisbardhëve, babai im, Mehmeti, me kasketë, në ditën e pajtimit.
Duke qenë se ky vit është edhe vit i 100-vjetorit të lindjes së Anton Çettës, këta rreshta kanë edhe qëllimin e homazhit ndaj jetës dhe veprës së Tij, në shërbim të kulturës shqiptare, pajtimit dhe bashkimit të popullit tonë. XHH
