Kryetari i Mitrovicës Agim Bahtiri, ka folur për raportet e tij me ish-kryetarin e Skenderajt Sami Lushtakun.
Bahtiri tha se arsyeja pse ka kandiduar për kryetar të Mitrovicës ishte pikërisht Lushtaku.
Ai tha se ish-kreu i Skenderajt para se ta merrte Bahtiri drejtimin dyert e komunës i kishte hapur me shkelm.
“Arsyeja pse unë kam kandiduar për kryetar komune në vitin 2013 është se në Mitrovicë, kryetar i vërtetë ka qenë Sami Lushtaku e kukullë e tij Avni Kastrati. Pra, Mitrovicën më është dashur t’ua kthej mitrovicasve”.
“Asokohe, Samiu ishte mësuar më i hap dyert e komunës së Mitrovicës me shkelm, ndërsa që nga viti 2013 së pari duhet me marrë leje e pastaj sikurse secili qytetarë, edhe ai mund ta vizitoj komunën që unë e udhëheqi”.
I pari i Mitrovicës shtoi se e kupton mllefin e Lushtakut, meqenëse i ka humbur tre komunat Mitrovicën, Skenderajn dhe Vushtrrinë, të cilat ai i kontrollonte.
Agim Bahtiri tha se humbjet e Sami Lushtakut, po vazhdojnë akoma, pasi që me “brryl” ia ka bërë edhe kryetari i komunës së Drenasit Ramiz Lladrovci.
“Sami, unë e kuptoj mllefin tënd, sepse duke qenë kryetar i tri komunave, fillimisht e ke humbur Mitrovicën, pastaj ortaku i humbjeve për ty ka vazhduar edhe në Skenderaj dhe Vushtrri. Por humbjet për ty kanë vazhduar edhe më shumë, sepse tash ‘brryl’ ta ka bërë edhe Ramiz Lladrovci”.
“Sami, ti je pensionuar nga politika, sa më parë që e kupton, aq ma me lehtësi e kalon mllefin. Sami, asnjëherë ty e as askënd nuk e kam gënjyer, sepse gjithmonë e them të vërtetën”.
Kreu i Mitrovicës tha se Sami Lushtaku, nuk është njeri i fjales.
Sipas tij Lushtaku, i kishte premtuar tij se nëse do ta humbte Mitrovicën, do të ia jepte të gjithë pasurinë.
“Nuk ta kam permendur më herët, por pasi që po merresh me mua, po ta përmendi. Ju nuk jeni njeri i fjalët, sepse sikur të ishit do ta paguanit kushtin që e ke humbur, kur keni thënë në prani edhe të djalit tuaj para zgjedhjeve të 2017 se nëse unë fitoj garën për kryetar komune, atëherë do të ma jepni krejt pasurinë”.
“Shumë folët për burrëri mbrëmë, andaj mbajeni fjalën dhe ma dorëzoni pasurinë, duke përfshirë edhe tokën që e keni privatizuar nga 50 euro arin. Ndërsa, nëse ju e mbani fjalën, unë atë pasuri do t’ua jap skamnorëve”.
“Sami, nuk ke lënë guri pa lëvizur për t’i ndihmuar PDK-së në zgjedhjet e 2017-së, por ju kam mundur të gjithëve së bashku. Mirëpo, sivjet nuk do të të mundoj shumë, sepse do të fitoj pa balotazh”.
